للناس اللي مش عارفه خضر العطار وعايزه تجيب شريط ليه وتسمعه وتعرفه احب اقولها الخطوات الصحيحه للحصول علي الشريط
اولا لازم تتأكد من مواعيد افلام الجزويت من الراجل اللي قاعد علي الباب مش من عماد مبروك لان عماد مبروك بقي بيهيس وبيضرب مواعيد افلام غلط
ثانيا متحطش امل كبير انك ممكن تلاقي النادي النوبي العام بيبيع شرايطه ، الناس هناك متفرغه لكيفيه القضاء علي كابتن كيكو لانه بيبيض علي احمد الدابودي اللي خد مركز اول عالم في السباحه بالزعانف (وهي رياضه مش اوليمبيه علي فكره) ومش راضي يخليه يبدأمشواره التدريبي،بصراحه انا شايف ان مش شرط علشان اخدت أول عالم يبقي لازم أدرب ، التدريب ليه ناسه وكابتن كيكو فعلا أهل لذلك .
ثالثا لازم تكون بتحب تشرب إجي كول لأنك وانت واقف في النادي النوبي العام مستني الاستاذ ناصر عقيد يحل مشكله كيكو وأحمد الدابودي ده الحاجه الوحيده اللي ممكن تتسلي بيها وتصبرك علي الوقفه
رابعا متروحش النادي وانت معاك محامي جوربتي وتطلب منهم انك تعمل استماره عضويه ليك وليه ده بيزعل استاذ ناصر عقيد وبيزعل ناس تانيه جو النادي برده .
خامسا لو اي شخص سخيف قالك انك ممكن تنزل اغاني خضر العطار من النت وتعملها علي اسطوانات متسمعش كلامه وخليك واثق في نفسك خضر العطار مش بتاع اسطوانات خضر العطار بتاع شرايط كاسيت وعلي راي المثل " اللي يقولك قتل واللي يقولك قتل ودفن في بير السلم واللي يقولك قتل وأكل ..عيال وسخه"
سادسا لو فشل حوار النادي النوبي العام متترددش روح كوم الدكه مباشره ( عارف ان كوم الدكه كيتش نيك بس ده المتاح )
سابعا متبقاش ساذج وتقعد علي دكة الدراويش وتسال هناك علي شرايط خضر لان كل اللي قاعدين علي القهوه منافسين لخضر ومحدش حيدلك خصوصا انك لسه معاك المحامي الجوربتي
ثامنا وانت في كوم الدكه اعرف ان كلمه السر ومفتاح الحياه هناك هو عبده شرف اي حد يوقفك يستفسر منك انت رايح فين رايح لمين قوله عبده شرف لو عايز تشتري حاجه عايزإيجار جديد في كوم الدكه برده حاول تجيب سيره عبده شرف في سياق الكلام ووريهم رقم موبايله دليل علي المعرفه الوثيقه
تاسعا لو حد قالك ان استاذ أحمد عبيد راجل مزاجنجي وبيحب يقعد مع الفنانين صدقه هو حيدلك رغم كل المشغولات الذهبيه اللي بيرتديها ورغم الكلب الضخم اللي مربيه وحتي لو شوفته قفل المطواه وحطها في جيبه أساله بابتسامه عريضه " اجيب شرايط كاسيت خضر العطار منين"
عاشرا اسمع كلام احمد عبيد وروح عند فلفل اللي في محطه مصر في ضهر المدهش بتاع الكشري وهات الشرايط النوبي اللي انت عايزها وتأكد من حاجتين ان السلفيين عمرهم ما حيوصلو لكوم الدكه واعرف ان فلفل بتاع شرايط الكاسيت معندهوش اي شرايط كاسيت للفنان علي كوبان
إجي كول : شاي بلبن
جوربتي : يعني ابن عرب مش نوبي
حنسمع دنيا غريبه دلوقتي وهي من شريط دنيا غريبه بمصاحبه فرقه علي كوبان
No comments:
Post a Comment